Mana-Vasanai

நிஜமாகும் நிழல்

2012-01-30T21:39:00.002-05:00

வானவில்லுக்குள் வண்ணங்கள் உண்டு

வந்து மோதும் அலைக்குள் ஆழம் உண்டு

வீசும் தென்றலுக்கு ஓசை உண்டு

பேசாத மனதிலும் ஆசை உண்டு

விண்ணில் தெரியும் வண்ணங்கள் போல்

நெஞ்சில் அலையும் எண்ணங்கள்.............

எத்தனையோ எத்தனையோ அவை

சத்தமே இல்லாத சங்கீதமோ

நிழலாய் மாறிய மரத்தில்

நிஜங்கள் கொஞ்சம் அடங்குமோ

நிமிடத்தில் மறையும் சூரியனே!

நாளை நீ மீண்டும் வருவாயோ?

தினம் தினம் மனம் முயலும்

முடியாமல் இரவில் உறங்கும்

கடலில் மறையும் கதிரவனாய்

காலையில் மீண்டும் மலரும்

இருப்பதெல்லாம் மாயையானதால்

இருவிழி மூடி நின்றேனோ!

நிஜங்கள் நிழலானதால்

கனவில் உன்னைக் கண்டேனோ !!

Picture- Sharadha Karthik

அலைபாயுதே மனம் அலைபாயுதே

2012-01-11T15:51:00.000-05:00

அலைபாயுதே என் மனம்
ஆசைகள் பெருகி அலைபாயுதே
வலையில் சிக்கிய வண்டாய்
மலரைத் தேடி அலைபாயுதே

உண்டு களித்து உறங்கி எழுந்து
ஊனும் உடலும் அலைபாயுதே
பட்டும் நகையும் பரிசும் புகழும்
பிடித்து பிடித்து மனம் அலைபாயுதே


வழி அறியா மானாய் மனம்
எதையோ  தேடி அலையுதே
நானென்னும் அகந்தையில்
விழி தெரியா அந்தகன் ஆனதே

தேவைகள் குறையுமோ
சேவைகள் பெருகுமோ
தேடக் கிடைக்காத செல்வமும்
நெஞ்சில் பெருகி நிலைக்குமோ

மெட்ராசில் மார்கழி

2012-01-10T18:07:00.001-05:00

மெட்ராசில் மார்கழி மாதம். சபாக்களில் சங்கீதம் களை கட்டிய நேரம்.

என் இரண்டு வார சென்னைப் பயணத்தில் இசையும் நாட்டியமும் இரு கண்களாய் மாறின. பிரசித்தி பெற்ற சபாக்கள் முதல் புதியதாய் முளைத்த சபாக்கள் வரை மூத்த கலைஞர்கள், ஜனரஞ்சக கலைஞர்கள், இளைய கலைஞர்கள், வெளிநாட்டு கலைஞர்கள் தங்கள் திறமையை வெளிப்படுத்தும் காலம். சாலையோர சஞ்சலப்புக்களுக்கு இடையே உயிரைக் கையில் பிடித்தபடி Music Academy யில் கால் வைத்தாகிவிட்டது.

நாலு மணி கச்சேரிக்கு ஒரு மணி நேரம் முன்னதாக வந்து விட்டோம். காபி வாங்க டோகென் கொடுக்கப்பட்டது. அந்த வரிசையில் நின்றபடி அமெரிக்காவும் லண்டனும் போக முடிந்தது. வந்திருக்கும் மாமாக்களும், மாமிகளும் தங்கள் மகன் மகள் பிரதாபத்தை வர்ணிக்க, பட்டுப்புடவைகளும் தங்க நகைகளும் ஜொலிக்க கூட்டம் சேரத் துவங்கியது. வரிசை நீளத்துவங்கினாலும் நேரம் தவறுவதில்லை. 3:30 மணி ஆகும் வரை காபி கடை திறக்க வில்லை. இந்தக் கூட்டம் எப்போது காபி குடித்து பஜ்ஜி சாப்பிட்டு கச்சேரி ஆரம்பிக்கும் என்று நான் நினைத்த போது, IST- Indian Stretchable Time என்ற ஏளனம் தவறு என்று சொல்லும்படி சரியாக நான்கு மணிக்கு கன்யாகுமரி வயலின் இசை ஆரம்பம்.

மெல்ல வீசும் தென்றலில் இசை கலந்து சுவாசம் மகிழ்ந்தது. ஆலாபனையில் அசைந்து, அடுக்கு ஸ்வரத்தில் அதிர்ந்து பேசும் விரல்களின் வந்தனத்தில் வரவல்லபன் துரிதமாய் வந்தார். ஏழு ஸ்வரங்களின் கோர்வையில் கேளாத ராகமாய் ஜன்காரத்வனியில் தியாகரஜரின் கணபதி சாயை வாசித்து, அதைத் தொடர்ந்து அனைவருக்கும் பரிச்சயமான ஜகதானந்தகார வாசித்தார். அடுத்து ஹரிகாம்போதியில் தினமணி வம்சவும், நடுநாயகமாய் ரங்கநாயகியும் கொஞ்ச, நடபைரவியில் ராகமும் தானமும் இணைய, சிந்துபைரவியில் அமைந்த தில்லானாவுடன் தேவகானம் அரங்கத்தை ஆக்கிரமித்தது.

இந்த இசை மழையைத் தொடர்ந்து, தனக்கே உரிய அதிகாரத்தோரணையில் தோடி வர்ணத்தை தேடிப் பிடித்து கச்சேரியை ஆரம்பித்தார் சாகேதராமன். இந்த சின்ன உருவத்தில் இப்படி ஒரு சாகித்யம் இருக்குமோ என்று எண்ணும்படி உரிமையுடன் அந்த சிவன் நாமம் சொல்லிப் பழகு என்று நம்மை ஹிந்தோளத்தில் அழகாய் அதட்டினார். வெற்றி நமதே என்று ஜெய ஜெய ஜெய என்று நாட்டையில் கம்பீரமாகப் பாடினார். திருமயிலையில் கோயில் கொண்ட கபாலியைக் காணக் கண்கோடி வேண்டும் என்று விலாவாரியாக ஒரு தமிழ் கீர்த்தனையை Music Academy இல் பாடி சங்கீத சரித்திரத்தில் ஒரு முத்திரையைப் பதித்தார். இதன் தாக்கத்தில் நான் அடுத்த நாள் கபாலியையும் கற்பகாம்பாளையும் தரிசிக்க ஓடியது உண்மை.

காத்திருந்த காலம் வீணாகாமல் உமையின் கடைக்கண் தரிசனம் தொடர்ந்து மைலாப்பூர் சபாவில் சிக்கில் குருசரணின் தேன் சொட்டும் சங்கீத மழையில் கிடைத்தது. வனஜாக்ஷ நின்னே என்று பேஹாக் இல் தொடங்கி மாருபல்க மனோரமணா என்று ஸ்ரீ ரஞ்சனியைத் தொட்டு, நளினகாந்தியின் நிஷாதமும் பஞ்சமும் கெஞ்ச 'நி பா த மே கதி என்று கொஞ்சினார். தெருவில் வாராயோ என்று நாட்டுப்புற மெட்டில் பாடி, ‘கற்ற கல்வி எல்லாம் கட்டுக்குள் அடங்கும்; கலை பெரிது காலம் சிறிது’ என்று தண்டபாணி தேசிகரின் வரிகளை ஆணித்தரமாய் நெஞ்சில் பதிய வைத்தார். கங்கையை முடிமேல் அணிந்ததனால் சிந்து பைரவி மைலாப்பூரில் பாய்ந்தாளோ; சுருட்டிய கேசத்து கங்கை சுனாமியாய் பொழிந்தாளோ..அந்தரங்க ரகசியம் அம்பலம் ஆனதினால் ஆடும் பாதம் நில்லாமல் தூக்கியதோ ...

அடுத்த நாள் அரங்கத்தை அதிர வைக்கும் ஐம்பது சிஷ்ய பரம்பரையுடன் அமர்ந்து, ராஜ கௌரவத்துடன் T.M.கிருஷ்ணா தனது இசையை ஆரம்பித்தார். 38 நிமிடம் ஸ்ரீ விஸ்வநாதம் ராகமாலிகையில் பாட மோகனம்,கௌளை, பைரவி, லலிதா, சங்கராபரணம், சாராங்கா, காம்போதி, பூபாளம், தேவக்ரியா என்று அத்தனை ராகங்களிலும் கற்பனை ஸ்வரங்கள் பாடி மக்களை ஈர்த்தார். அடுத்து பாடியது வராளி என்று அனைவரும் யூகிக்க அது காலாநிதி ராகம் என்று எடுத்து சொல்லி நாடே நா என்று தியாகராஜா கிருதியைப் பாடினார். பின்னர் காம்போதியை விலாவாரியாகப் பாடி அரங்கத்தை அடக்கினார்.

கிழக்கும் மேற்கும் சங்கமிக்க, பாஸ்டன் நகரத்து கிடார் பிரசன்னாவின் சென்னையில் திருவையாறு நிகழ்ச்சி. சக்தி மசாலாவின் சைவ உணவுத் திருவிழாவும், இசை மழையும் விஜய் டிவியின் உபயத்தில் அனைவருக்கும் கிடைத்தது. அரங்கத்துக்கு அரங்கம் வேறுபட, இசை வல்லுனர்கள் தங்கள் திறமைக்கு சவாலாய் கொண்டனர். சரணம் பவ கருணாமய என்று ஹம்ச விநோதியில் தொடங்கி எந்தரோ மகானுபாவா வில் தொடர்ந்து, வாசஸ் பதியில் இழைத்து, பின்னர் ராக மாலிகாவில் ராகம் தானம் பல்லவியை சுவைக்க வைத்தார். ஏறி இறங்கும் வாழ்க்கையாய் ரேவதியும், எழிலாய் நடக்கும் மங்கையாய் மோகனமும், முதலும் முடிவுமாய் ஹம்சத்வனியும், மறைந்து இருந்து பார்த்த மர்மமாய் ஹிந்தோளமும் சில வளைவு சுளிவுகளுடன் 4 on 5 என்ற பெயரில் புரியாத புதிரை புரிய வைக்கும் வண்ணம் வாசித்தார். இறுதியில் அன்பை பொழியும் அமைதி என்று ஒரு சேர்ந்திசை வழங்கினார். திரையுலகில் கால் வைக்கும் இவரது கைவரிசை நிச்சயம் கொடிகட்டும் என்பதில் ஐயமில்லை.

டிசம்பர் 25ஆம் நாள். இந்த ஆண்டு க்றிஸ்துமஸ் Music Academy இல் என்று தீர்மானம் செய்து விட்டோம். காலை ஒன்பது மணிக்கு T.N.கிருஷ்ணன் அவர்களது குடும்பத்து மூவர் இணைந்து வழங்கும் வயலின் இசை. அந்த இரண்டு மணி நேரத்தில் ‘நானென்னும் அகந்தை விலகியது; எல்லாம் நீயே; என்பது புரிந்தது. தேடினாலும் கிடைக்காத அந்த தெய்வத்தை இந்த எண்பது வயது கையசைவில் கொண்டு வந்து நிறுத்தியது அற்புதமே. அதைத் தொடர்ந்து அமெரிக்க மண்ணில் பிறந்து, வளர்ந்து இன்று கர்நாடிக சங்கீத உலகில் முன்னணியில் நின்று நமக்கெல்லாம் நம்பிக்கை ஊட்டும் சந்தீப் நாராயணனின் கச்சேரி. முதல் வரிசையில் அமர்ந்து T.N.கிருஷ்ணன் முழு கச்சேரி கேட்டதே அதன் பிரபலம் சொல்லும். மாலை ரஞ்சனி காயத்ரியின் இசை. கூட்டம் அலை மோதியது. நாட்டை வர்ணத்தில் ஆரம்பித்து, நந்த கோபனின் தர்பாரில் திருப்பாவை பாடி அடுக்கு சங்கதியில் அமைந்த சாவேரியில் பலமு குலமு ஏல ராமா என்று கொஞ்ச கேட்பவர் நெஞ்சம் இளகியது. தேவ காந்தாரியில் சாரதே வீணா பாடி, சண்முகப்ரியாவில் மாமவ கருணைய பாடி அதைத் தொடர்ந்து ஜனரஞ்சனியில் ஸ்மரணே சுகமு ராமா நாம என்று பாடிய போது எந்த ராகத்தில் பாடினாலும் உன் பாடல் சுகம், பாடாது நான் கேட்டால் கேள்வி ஞானமே சுகம் என்று கவி பாட தோன்றியது. ரஞ்சனி காயத்ரி கச்சேரியில் விருத்தம் கேட்பது சுகத்திலும் சுகம். ஆதியாய் நடுவுமாகி அளவில்லா அளவுமாகி என்று தில்லை பொது நடம் போற்றிய போது கண்கள் மல்கியது.

டிசம்பர் 31. இன்னும் இரண்டு மணி நேரத்தில் புது வருடம் பிறக்கப் போகிறது. ‘கர்நாடிகா’ வின் மூலம் Music Academy இல் சிறப்பு நிகழ்ச்சி. பன்னிரண்டு ராசி பலன்களுக்கும், கிரகங்கங்களின் சுழற்சிகளுக்கும், ஏழு ஸ்வரங்களுக்கும், இசைக்கும் உள்ள ஒற்றுமையை விவரித்தபடி நிகழ்ச்சி. பல கை தேர்ந்த பாடகர்கள், கலைஞர்களின் இசை நிகழ்ச்சி . திருச்சூர் Brothers பாடிய ராமா நாமம் கலியுகத்திற்கு விமோசனம் தரும் படி இருந்தது குறிப்பிடத்தக்கது. சரியாக பன்னிரண்டு மணி. அரங்கம் அமைதியில் ஆள, அனைத்துக் கலைஞர்களும் இணைந்து எந்தரோ மகானுபாவா என்று பாட நம் மனம் சாந்தி அடைந்தது. எப்போதும் அமெரிக்க தொலைகாட்சியில் நியூயார்க் நகர கொண்டாட்டத்தை கண்டு ரசிக்கும் அடுத்த தலைமுறையும், கண் கொட்டாது, காது மூளாது ரசித்துக் கேட்டது வரப்பிரசாதம். தொடர்ந்து சாந்தி நிலவ வேண்டும் பாடியது மிகவும் அருமை.

மொத்தத்தில் மெட்ராசில் மார்கழி எனக்கு ஒரு மறக்க முடியாத அனுபவம்.

சக்தி

2011-12-14T16:37:00.000-05:00

மனம் போன போக்கில் எண்ணம் போகும்
வழி தெரியாத காட்டில் விழி மூடும்

கண்ணை மூடினால் இருளும்
இருள் விலக தெரியும் சக்தி

ஏறி இறங்கும் வாழ்க்கையில்
அசைந்து வரும் இசையாய்

மாறி வரும் தட்ப நிலையில்
மாறாது தங்கும் சக்தி

நீந்தும் கடலும்
நித்தம் தேடலும்

பாயும் வெள்ளமும்
ஓடும் நதியும்

கொட்டும் அருவியும்
கொஞ்சும் மழலையும்

இயற்கையின் எழிலாய்
யோக நிலை முடிவாய்

என்னுள் ஒளிந்த ஒளியாய்
இதமாய் வருடும் சக்தி ...

தனிமை

2011-11-15T09:21:00.002-05:00

கண்ணுக்குள் கரையும் கருமையாய்
மண்ணுக்குள் மறையும் பசுமையாய்
விண்ணுக்குள் வந்து போகும் நிலவாய்
என் மனத்துள் மூடிக்கிடக்கும் தனிமை

உறவுகள் சூழ கலைந்து விடும்
உள் மனதின் ஆழத்தில் அடங்கிவிடும்
பேசாத மௌனமாய் அவ்வப்போது
சொல்லாமல் என்னுள் எட்டிப் பார்க்கும்

காணக் கிடைக்காத கோடை நிழலாய்
பனியில் பரவச வெப்பமாய்
கண்ணாமூச்சி ஆடி என்னைக்
கலங்கடிக்கும் தனிமை

தனித்து இருந்தால் தவிக்கும் மானுடம்
துணையுடன் இருந்தால் தனிமை தேடும்
எல்லாம் இருந்தால் வெறுமை வந்திடும்
ஏக்கம் மிகுந்தால் தனிமை கசந்திடும்

சில நேரங்களில் சிந்திக்க வைக்கும்
சில நேரங்களில் சுமையாய் தோன்றும்
சிலுசிலுக்கும் தென்றலாய் என்னை
தழுவிச் செல்லும் தனிமை

மலரும் இசை

2011-10-24T13:20:00.019-04:00

பொழியும் இசையில்
வழியும் கானங்கள்

விளையும் பூமியில்
வகை வகையாய் மலர்கள்

ஏழு ஸ்வரங்களுக்குள்
எத்தனை ராகங்கள்
ராகங்கள் மாலையானால்
மணங்கள் சங்கமமோ!

உருவத்தில் மானுடம்
உணர்வில் பலவிதம்

உறவுகள் ஒவ்வொன்றும்
உருக்கும் ரகங்களோ

பொங்கும் கோபம்
புயலாய் மாறினால்

மலர்ந்த மல்லியும்
முகம் வாடிவிடும்

அன்பாய் அரவணைத்தால்
அரும்பும் மலராகும்
காயாகி கனியாகி
மீண்டும் மொட்டு விடும்

கதிரவனைக் கண்டால்
தலையாட்டும் காந்தியும்

நிலவைத் தேடி நிற்கும்
நடு நிசி அல்லியும்

மண்ணில் விழுந்த போதும்
மணம் வீசும் முல்லையும்
குணங்களில் வேறுபட்ட
குளத்தாமரை போல்

அலையலையாய் மனம்
ஆழ்கடலில் அமைதி தேடும்

சலசலக்கும் அருவியும்
நதியில் சங்கமிக்கும்

ஸ்வரங்கள் வேறுபடலாம்
ராகங்கள் பெயரிடலாம்

சங்கமிக்கும் இசையில்
மனம் நிம்மதி பெறலாம்.

சிறகின்றி பறக்கும் மனம்

2011-09-06T22:31:00.002-04:00

சிறகிருந்தும் பறக்கவில்லை

வருடும் அலையை விலகவில்லை

நீண்ட இரவும் ஒரு நாள் விடியும்

விடியல் வந்தால் வளர்பிறை மறையும்

காலம் எங்கெங்கோ கூட்டி செல்லும்

பாலங்கள் பல தாண்டி போகும்

வருடங்கள் பல ஓடிவிடும்

வாசல்கள் பல திறந்து விடும்

பிறந்த இடம் ஒன்று

வளர்ந்த இடம் ஒன்று

வாழும் இடம் ஒன்று

மடியும் இடம் எதுவோ

நாடு விட்டு நாடு பறந்ததால்

நானும் ஒரு நாடோடியோ

காடு மலை தாண்டியதால்

காலம் கடந்த பயணியோ

வீடுகள் மாற்றுவதால்

பற்றற்ற ஞாநியோ

கனவுகளில் வாழ்வதால்

நான் கவிதாயினியோ

இன்னும் சற்று நேரத்தில்

மௌனம் கலையும்

மானுடக் கூட்டம்

காற்றில் கலந்து வரும்

இனிய தனிமை என்னை

விட்டு விலகும்....

அப்போது,

சிறகு விரித்து உடல் பறக்கும்

அதுவரை

மனம் மட்டும் பறக்கும்

படம் - சேது வோரா

புதுக்கவிதை - வரலட்சுமி நிரஞ்சன்

காத்திருக்கும் படகு

2011-09-02T20:32:00.000-04:00

இக்கரைக்கு அக்கரை

எப்போதும் பசுமை

கடந்து விடத் துடிக்கும் கால்கள்

சுமந்து விடத் காத்திருக்கும் படகு

காலங்கள் கடந்தோம்

கரைகள் களைந்தோம்

பயணங்கள் ஆனால் முடிவதில்லை

மன அலைகள் என்றும் ஓய்வதில்லை

ஓயாத கடல் அலையில்

ஒளிந்திருக்கும் ஆழ் மனம்

பேசாத மௌனத்தில்

படர்ந்திருக்கும் உண்மை

நாடு விட்டு நாடு வந்தோம்

கனவுகளை நிஜமாக்கினோம்

பாடும் இக்கவிதையில் அக்கரை

பசுமையை இக்கரையில் காண்போம்

படம் - சுதா ராணி

புதுக்கவிதை- வரலட்சுமி நிரஞ்சன்

கடவுளும் காதலும்

2011-08-29T21:55:00.002-04:00

பச்சை மலையில் வெள்ளைக்

கோடாய் பாயும் அருவி

இச்சை மனதில் கேள்விக்

குறியாய் எழும் அறிவு

கடவுள் இல்லை என்று ஒரு சாரார்

காதல் பொய் என்று மறு சாரார்

இயற்கையின் அழகைக் கண்டால்

இரண்டும் கலந்து தெரியுமன்றோ!

மலையைக் குடைந்து குளிரும் அருவி

சிலையைக் கூட கடவுளாக்கும் அறிவு

அருவியாய் பெருகும் காதல்

அணைகள் கடக்கும் ஆன்மீகம்

மண்ணில் மறையும் வாசம் அது

கண்ணில் தெரியும் காதல்

மறைத்தாலும் வீசும் வாசம்

மனம் மறந்தாலும் மௌனமாய் பேசும்

மெய்யே பொய்யாகும் ஆன்மீகத்தில்

பொய்யும் மெய்யாகும் காதலில்

கடந்து உள்ளிருக்கும் கடவுள்

பறந்து விரிந்திருக்கும் காதல்

கடவுளையும் காதலையும்

மறுத்தால், மறைத்தால்

காலமிங்கு வீணாய்

கரையுமன்றோ !.

புகைப்படம்- பிரபு

புதுக்கவிதை - வரலக்ஷ்மி நிரஞ்சன்

இசைக்க துடிக்கும் மனம்

2011-08-25T23:29:00.001-04:00

தமிழினிமை ரசிக்க செய்தாய்

கவி பாடும் திறன் தந்தாய்

தடைகள் தாண்டும் திமிர் தந்தாய்

எப்போதும் நெஞ்சில் நின்னினைவு தந்தாய்

சென்றஇடம் எல்லாம் சிறக்க கல்வி தந்தாய்

சேரும் உறவுகளில் சுகம் தந்தாய்

எழிலாய் பேசும் கலை தந்தாய்

இசைக்கு உருகும் மனம் தந்தாய்

இப்பிறவியில் குறையுண்டோ என்றால்

இல்லையென்று சொல்லி நிற்பேன்

மீண்டும் ஒரு முறை பிறக்க வைத்தால்

பாடும் திறனை வேண்டி நிற்பேன்

பெருகும் வெள்ளமாய் இசை அதில்

உருகும் உள்ளமாய் எந்தன் மனம்

எழுதும் விரல்கள் வழியே

வழியும் ஒரு மௌனராகம்

இசையில் தெரியும் தரிசனம்

2011-08-25T23:06:00.001-04:00

சஞ்சலுக்கும் மனத்தை

தாலாட்டும் ஆனந்த பைரவி

ஆடிவிடும் ஊஞ்சலில்

ஓடி வருவாள் காமாக்ஷி

ஆனந்த தாண்டவம் ஆடும்

அந்த அற்புத சிவனை

பட படவென அண்டம் வெடிக்க

பறக்கும் ஸ்வரங்கள் பாராட்டும்...

வேதங்கள் சொல்லும் உன் புராணம்

சாத்திரங்கள் புரியாது மனம் தேடும்

வார்த்தைகள் புரியாத மொழியிலும்

இசையில் தெரியும் விடைகள்

சரமாரியாக செய்த தாளமழையில்

சங்கீத சாரலில் மனம் நனையும்

பாதைகள் யாவும் சேரும் இந்த

சங்கரா பரண பயணத்தில்

பாற்கடலில் பள்ளி கொண்ட

புருஷோத்தமனை பக்கத்தில் அழைத்தாயோ

என்ன பெயர் சொல்லி அழைத்தாலும்

எங்கிருந்தோ வருவான்

இடைச்சாதி நானென்பான்

கால் சதங்கை துள்ள கண்முன்

காளிங்க நடனம் ஆடி

ஹமீர் கல்யாணியில் கலங்கடிப்பான்

ஓங்கி உலகளந்த பெருமாளே

உன்னை நினைக்க நினைக்க

இசை பெருகும்

இசை பெருக பெருக, உள்ளம் உருகும்.

உள்ளம் உருக உருக, விழிகள் மூடும்

மூடிய விழிகளுக்குள் உன்னுருவம்

விழித்த மனத்துள் உன்னுருவம்

விடையறியா கேள்வியாய் உன்னுருவம்

கேள்வியே விடையாய் மாறிய ஸ்வரூபம்

தேடத் தேட கிடைக்காத திரு உருவம்

திருநாமம் உரைத்தால் மனமறியும்

தூணிலும் இருக்கும்

துரும்பிலும் இருக்கும்

அழைத்தால் ஓடி வந்து

நம்முன் நிற்கும்

விழித்தபடி கண்டேன்

விஸ்வரூப தரிசனம்

உன்னருமை இசையில்

சத்தியமாய் தெரிந்தான்

ஸ்ரீமன் நாராயணன்

காதல் இருந்தால் எல்லாம் பிடிக்கும்

2011-05-15T15:29:00.005-04:00

என்னில் இருக்கும் உன்னை பிடிக்கும்
உன்னைப் பிடித்த என்னைப் பிடிக்கும்

காலை அவசரத்தில் ஓரப் பார்வை பிடிக்கும்
மதிய அவகாசத்தில் கைப்பேசி சிணுங்க பிடிக்கும்

மாலையில் மங்கும் வானம் பிடிக்கும்
இரவில் பேசாத மௌனம் பிடிக்கும்

ஓட ஓட கால்கள் துவள்வது பிடிக்கும்
விடுமுறையில் உன்னோடு ஓய்வு பிடிக்கும்

வண்ண வண்ண கனவுகள் பிடிக்கும்
விளையாட்டாய் செல்ல கோபம் பிடிக்கும்

உறவை ஆழமாக்கும் ஊடல் பிடிக்கும்
ஊடலைத் தொடரும் காதல் பிடிக்கும்

காதலில் கட்டுண்டவரைக் காணப் பிடிக்கும்
காலாற காலத்தை அசை போட பிடிக்கும்

கண்ணை மூடி காதலிக்க பிடிக்கும்
காத்திருக்கும் வேளையில் கவிதை பிடிக்கும்

அம்மா அகரம் முதல் ஔகரம் வரை

2011-05-11T21:22:00.000-04:00

அன்னையாய் வந்து பிறந்தாள்
ஆசையாய் அமுது தந்தாள்
இதமாய் வருடி சென்றாள்
ஈன்ற பொழுதில் மகிழ்ந்தாள்
உயிரணுக்கள் எல்லாம் சொல்லும்
ஊருக்கே கேட்கும் சொல்
எப்போதும் அருகில் நீயிருந்தால்
ஏக்கம் விலகும் எங்களுக்கு
ஐயிரண்டு திங்கள் நீ சுமந்ததால்
ஒவ்வொரு நாளும் அன்னையர் தினம்
ஓதும் மறைகள் உனக்கு அர்ப்பணம்
ஔடதமும் இனிப்பது உன் கைமணம்
உயிர் எழுத்துக்களில் பாடினேன் என்
உயிர் மெய்யானது உன்னால்
தாய் மொழி தமிழ் ஆகும்
உலக மொழி அம்மாவாகும்

அன்னை

2011-05-11T21:06:00.000-04:00

இரு கரம் தூக்கிய பாஞ்சாலிக்கு
ஓடி வந்த கண்ணா!
பாசுரம் பாடிய ஆழ்வாருக்கு
பரவசம் தந்த பரந்தாமா !

தெவிட்டாத தமிழில் தேவாரம்
ஓதுவார் காண்பார் பரமசிவன்
வேண்டாத கனியை உண்டதால்
தேடும் மானுடம் கடவுளை

கூவி அழைத்தால் கந்தன் வருவானோ!
கொஞ்சி அழைத்தால் இராமன் வருவனோ !
பாடி அழைக்க இசை அறிவு போதவில்லை
கவிதையில் கண்ணனைக் காண பாரதியுமில்லை

தியானம் தினம் செய்ய அவகாசமில்லை
பூசை செய்ய மந்திரம் தெரியவில்லை
போதும் சுமை என சொல்லி
வேண்டாம் மறு பிறவி என்றேன்

இப்பிறவியில் உன்னை எப்படி காண்பேன்
செப்புவாய் இறைவா எனக் கேட்டு நின்றேன்
அவனே வந்தான் என் வீட்டினில் அன்னையாய்
தினமும் தெரிந்தான் கடவுளாய் நெஞ்சினில்

எழுத வைக்கும் குரல்

2011-04-29T14:27:00.002-04:00

எனக்குள் ஒரு குரல் வந்து
எழுது எழுது என்று சொல்லும்

ஏனிந்த பிறவி என்று சலிக்கையில்
ஏமாற்றம் என்னைத் தாக்கையில்

நேற்றைய நினைவுகள் நிரப்புகையில்
நாளைய கேள்வியின் நடுக்கத்தில்

வழி முழுதும் கிடைக்கும் நட்பில்
விழி நனைக்கும் சில உறவுகளில்

வாசனையாய் மண் மணக்கையில்
வானவில்லாய் வசந்தம் வருடுகையில்

ஆசைகள் அடங்கி மனம் நிறைகையில்
அடங்காமல் அழுகை பெருகுகையில்

அலையலையாய் எண்ணங்கள் ஓடுகையில்
அமைதியாய் ஆழ்கடல் அசத்துகையில்

எனக்குள் ஒரு குரல் வந்து
எழுது எழுது என்று சொல்லும்

இயற்கை

2011-04-28T21:09:00.004-04:00

பூத்துவிடு மொட்டே பூத்துவிடு
நாளை வரை காத்திராமல்
இன்றே எனக்காக பூத்துவிடு

பெய்துவிடு மழையே பெய்துவிடு
வாடிய பயிரும் நிமிரும் உன்னால்
வஞ்சனை இல்லாமல் பெய்துவிடு

நனைந்துவிடு காலே நனைந்துவிடு
அலைகள் என்றும் ஓய்வதில்லை
அதனால் ஆரவாரமாய் நனைந்துவிடு

வளர்ந்துவிடு மகளே வளர்ந்துவிடு
என் வாழ்வின் நீங்கா வசந்தமாய்
வருடா வருடம் வளர்ந்துவிடு

விளையாடிவிடு மகனே விளையாடிவிடு
வருங்காலக் கவலையின்றி
வருடும் இளவேனிலாய் விளையாடிவிடு

செய்துவிடு தானம் செய்துவிடு
இல்லாமல் தவிக்கும் மக்களுக்கு
தயங்காமல் தானம் செய்துவிடு

நினைத்துவிடு மனமே நினைத்துவிடு
முதிர்ந்தால் ஞாபகம் உதிரும்
இளமையில் கடவுளை நினைத்துவிடு

நேசித்துவிடு நெஞ்சே நேசித்துவிடு
கசக்கும் வெறுப்பை நீக்கி
இன்றே இனிப்பாய் நேசித்துவிடு

ஓடும் காலே சற்றே நின்றுவிடு
வீசும் தென்றலை இரசித்துவிடு
பேசும் பறவையை கேட்டுவிடு

காசு வரும் போகும்
காலம் சொல்லாமல் பறக்கும்
நிலவு தேய்ந்து வளரும்

தினம் வரும் விடியலாய்
இயற்கையின் அதிசயமே நீ!
என்றும் என் இதயம் நிரப்பிவிடு

வசந்தம்

2011-04-24T12:25:00.006-04:00

பாதையோரத்தில் பனி விலகும்
பச்சை மரம் இலேசாக துளிரும்

வானத்தில் மின்னல் கண் சிமிட்டும்
கொட்டும் மழையில் பூமி நனையும்

பூக்கட்டுமா என்று மொட்டு கேட்கும்
புன்னகையுடன் புல்வெளி மிளிரும்

எங்கிருந்தோ பறவைகள்
என் தோட்டம் தேடி வந்து விடும்

இதோ என் வாசலில்
சிறு கூடும் கட்டி விடும்

பழைய சைக்கிள் தூசு விலகும்
மைதானத்தில் பந்துகள் விளையாடும்

நாட்கள் மெல்ல மெல்ல நீளும்
இரவுகள் சீக்கிரம் விடிந்து விடும்

ஓடிவிளையாடும் குழந்தைகளின்
உற்சாகத்தில் வசந்தம் வந்து விடும்

மீண்டும் மீண்டும் வரும் வசந்தம் கண்டு
சின்னக் குழந்தையாய் என் மனம் குதூகலிக்கும்

ஷ்யாம்- என்றும் அழியா நினைவுகள்

2011-03-20T09:52:00.005-04:00

வளர்ந்து தேயும்
நிலவு போல் வரும்
நின்னின் நினைவு

எங்கிருந்தோ வந்து
கடிக்கும் எறும்பு போல்
நின்னின் நினைவு

வருடங்கள் பல
ஓடினாலும் வருடும்
நின்னின் நினைவு

சிறு வயது
விளையாட்டும் குறும்பும்
நிற்கும் நினைவு

வருடா வருடம்
வயதாகும் உண்மை
எமக்கு உண்டு

நினைவில் நின்ற
உனக்கு எப்பொழுதும்
அதே வயது!

என்றும் இளமையாய்
இன்று பூத்த மலராய்
நினைவில் நின்றாய்!

வெள்ளைப் பனிமலை மேனி

2011-02-10T21:44:00.003-05:00

வெள்ளைப் பனிமலை மேனி
செவ்வாழை இதழோ
கருந்திராட்சை கண்கள்
உதிர்ந்த மரமே உன்
உலகளாவிய கரங்களோ
பனியில் காயும் கொழுந்தே அந்த
அரங்கனை கண்டால் இந்த
பனியுலகமும் இந்திரலோகமோ!

காணும் திசையெங்கும்
கண்டேன் உன்னை நந்தலாலா
வேணுகானம் கேட்டிடவே
பூணும் உடைகள் ஆயிரமோ!
ஆலயப் பூசை தரும் ஆனந்தம்
அந்தரங்க தியானம் தரும் அமைதி
வழியும் இசையில் கரையும் மனம்
விழிக்கும் ஒவ்வொரு நாளும் உன்னுபயம்

எங்கும் எதிலும் நிறைந்த உருவே
உருவமே இல்லாத அருவே
மாயையில் மறைந்த மதியே
மதிக்கு புரியாத விதியே
விசையும் நீயாகி என்னை
அசைக்கும் சக்தியும் நீயாகி
உடலுள் கலந்த உயிருமாகி
யாவுமாகி நின்ற பரம்பொருளே!

ஆழ் கடலும் வாழ்க்கையும்

2011-01-15T22:04:00.003-05:00

எங்கிருந்தோ எண்ண அலைகள்
என்னை வந்து தாக்க
இதழில் வீசும் புன்னகையாய்
மாலை நேரத்து மஞ்சள் வானம்

வளரும் நிலவு வந்து விடும்
என்று கண் மூடும் கதிரவன்
கருமையும் ஒரு அழகென்று
கர்வமாய் கொந்தளிக்கும் கடல்

ஓயாத அலை கடலில்
ஒளிந்திருக்கும் வெண்ணுரையே
தொடு வானம் தொட்டு விட
தினம் துடிக்கும் ஆழ் மனமே

தேடல் எதுவென்று தெரியாமல்
தொடர்ந்திடும் வாழ்க்கை
முடிவே இல்லாமல் போகும்
நீண்ட தொரு பயணம்

நாட்கள் நகரும் வேகத்தில்
வழி முழுக்க கிடைக்கும் சிநேகம்
பிரிவும் சந்திப்பும் இங்கு
தினம் நடக்கும் சங்கதியே

இரவும் பகலும் மாறுவதும்
தென்றலும் புயலும் வீசுவதும்
வளர்பிறையும் தேய்பிறையும்
இந்த விளையாட்டில் சமமானதே!

அனுபவம்

2010-05-02T00:03:00.000-04:00

சல சலக்கும் அருவியும் நீயே
ஆழ்கடலின் அமைதியும் நீயே
மோதி மிதிக்கும் புயலும் நீயே
வீசி வரும் தென்றலும் நீயே

கண்ணுக்கு இமை வைத்தான்
கடலுக்கு கரை வைத்தான்
நெஞ்சுக்குள் உணர்வு வைத்தான்
நிம்மதியை மட்டும் தேட வைத்தான்

ஏனிந்த பிறவி புரியவில்லை
எத்தனை அவதி தெரியவில்லை
எல்லாமே மாயை எனினும் இந்த
அனுபவம் மட்டும் நிஜமன்றோ

எதையோ எப்போதும்
தேடி நிற்கும் என் மனம்
உன்னை எல்லாம் கடந்து
உள்ளிருப்பவனாய் கண்டது

உடல் இயங்கும் விதத்தை
மருத்துவம் சொல்ல முயலும்
உள்ளம் இயங்கும் விதத்தை
ஆன்மீகம் புரிய வைக்கும்

உன்னோடு இருக்கும்
ஒவ்வொரு வினாடியும்
உண்மைகள் பலதை
உணர வைக்கும்

உன்னுடைய உதவியில்
நாளை என்ற கேள்வி மறையும்
நேற்று நீங்கா நினைவாகும்
இன்று மட்டும் தெளிவாகும்
என்றும் அன்புடன்
வரலட்சுமி நிரஞ்சன்

Manam

2010-03-14T10:18:00.002-04:00

மெல்ல வீசும் தென்றல்
தூறிப் பெய்யும் மழை
இனிமையாய் சங்கீதம்
என் மனம் மட்டும் ஏன் ஓடுகிறது?

சல சல அருவியும்
சாந்தமாகும் நதியில்
எப்போதும் சிந்திக்கும்
என் மனத்தில் நிச்சலனம் எங்கே?

யாதுமாகி நின்றாய் காளி
எல்லாமாகி நின்றாய் இறைவா
என்னை அழிக்கும் சூராவளியே
என்னில் இருக்கும் இனிமையே

அறிவியல் இதற்கு ஏதேதோ
பெயர் கொடுக்கும்
ஆன்மீகம் இதை
கற்றுத் தர முயற்சிக்கும்

நாளமில்லா சுரப்பியின் செயல் பாடோ
நானென்னும் அகம்பாவமோ
நாளை என்பது கேள்விக்குறியோ
நேற்று என்பது ஆச்சரியக்குறியோ

இன்று மட்டும் முற்றுப் புள்ளியாக
இந்த மனம் தேடலைத் தொடங்கும்
இது விடை தேடும் விடுகதையோ
முடிவில்லா தொடர்கதையோ............

இந்தியப் பயணம்.

2010-02-01T11:44:00.002-05:00

மனம் ஏங்கும் உறவுகளுக்கு
உடல் ஏங்கும் வெயிலுக்கு
செவிகள் ஏங்கும் சத்ததிற்கு
விழிகள் ஏங்கும் வண்ணங்களுக்கு

மண் வாசனையும்
மக்கள் பேச்சும்
சாலை நெரிசலும்
விழித்திடும் மீனம்பாக்கம்

சுற்றம் நெருங்கி
அறுசுவை உணவு தர
சுடுகின்ற வெப்பமும்
இதமாய் தெரியும்

இரண்டே வாரங்கள்
என்ற போதும் மனம்
பயணக் கனவுகளில்
பரவசமாய் பவனிக்கும்

கோவில் கடைத்தெரு
கூட்டமாய் நடை பாதை
தேமதுரத் தமிழோசை
தெவிட்டாத சங்கீதம்

அமெரிக்க சிறுவர்களுக்கு
ஆட்டோ அதிசயம்
ஆனந்த கும்மியில்
அலைபாயும் மனம்

இன்னும் மூன்று நாட்களில்
என் இனிய இந்தியப் பயணம்
எப்போதும் இந்த மனத்தில்
நிறைவாய் இடம் பெறும்.

isaippuyal

2009-10-05T14:14:00.008-04:00

மெல்ல வீசியது கத்ரியின் தென்றல்
மேனி சிலிர்த்தது ஆபோகி வரணம்
வேகம் வேகம் வேகம் இதில்
விழித்திடும் ஒவ்வொரு அணுவும்

மூன்றாம் காலப் புயலில்
முழுமை பெறும் இந்தப்பிறவி
சாந்தமாய் வரும் பஹுதாரியில்
சாய்ந்திடும் மனக் கவலைகள்

கன்யாகுமரியின் கையசைவில்
இசைக்கடல் கரை புரண்டோட
வீசுவது ஸுநாமியோ என்று
வந்தவர் வியந்துவிட

ஆர்ப்பரிக்கும் கடல் அடங்கி
அமைதியான நீரோடை
சுடுகின்ற கதிரவனை அடுத்து
குளிர்ந்த நிலவு எந்தரோ மகானுபாவா

பாடப் பாட அலுக்காத ஸ்ரீராகம்
கேட்க கேட்க தெவிட்டாத கானம்
எடுத்தப் பிறவி வீணில்லை என்று
எண்ண வைக்கும் இசையமுதம்

நவராத்திரியில் கர்ணரஞ்சனி
அரங்கத்தை அலங்கரிக்க
அசையாத தலைகளில்லை
ஆடாத கால்களில்லை

உச்சஸ்தாயியில் உற்சாகமாய்
ஆர்ப்பரிக்கும் அரங்கம்
கீழிறங்கும் ஸ்வரஸ்தானத்தில்
கைகட்டி வாய்பொத்தி அடங்கும்

நிரம்பி வழியும் கூடத்தில்
தூசு விழும் மௌனத்தில்
நாலு வாத்திய இராகமாலிகை
நரம்புகளை தொட்டு சென்றது

சஃசோபோன் ஒலியும்
வயலின் இசையும் இணைந்தால்
ஒலியா ஒளியா எது வேகம்
இடியா மின்னலா எது வீரியம்

குறையின்றி மனம் கோவிந்தனைக் காண
முத்துக் குமரனும் தில்லானாவும் கிடைக்க
மறை பொருள் கண்டது போல்
பித்து மனம் மகிழ்ந்ததுவே

உடலும் உள்ளமும் உருகியதில்
உயிரின் உதிரம் உறைந்ததோ
இசையென்னும் சக்திக்கு
சரணாகதி அடைந்ததோ!

மௌனம்

2009-08-21T09:21:00.003-04:00

அலைபாயும் மனம்
அணைபோடும் மௌனம்
கொந்தளிக்கும் சினம்
குளிர வைக்கும் மௌனம்

கண்கள் பேசும் வார்த்தை
காதுகள் கேட்காது
மௌனம் பேசும் மொழியை
அடுத்த மனம் அறியாது

தவறு செய்தவரை
தண்டிக்கும் மௌனம்
தவறு செய்யாதவரை
தவிக்க வைக்கும் மௌனம்

எப்போதும் பேசி வரும்
என் மனமே
அவ்வப்போது மௌனமாய்
இருக்கப் பழகு

மௌனம் ஒரு ஆயுதம்
சத்தமின்றி இரத்தமின்றி
சங்கடங்கள் தீர்க்கும்
சஞ்சலங்கள் அகலும்

சில நேரங்களில்
சில மௌனங்கள்
சிறகடிக்கும் சிந்தைக்கு
ஓய்வு தரும்.

மண் வாசனை

2009-08-17T19:24:00.002-04:00

என் கண்ணுக்குள்ளும்

கனவுகள் வரும்

காகிதம் அதை காசு

கொடுத்து வாங்காது

என் நெஞ்சுக்குள்ளும்

நினைவுகள் நிற்கும்

நிலமை அது

நீண்ட நாள் நிற்காது

என் மனத்துள்ளும்

மழை பெய்யும்

மனம் அதை

மறைத்துவிடும்

மழை ஓய்ந்தபின்

மண் வாசனை

மட்டுமே மிஞ்சும்

காதல்

2009-08-17T19:17:00.005-04:00

கவர்தல் மட்டுமே காதல் இல்லை

கல்யாணம் மட்டுமே முடிவில்லை

கனவில் வாழ்தல் முறையில்லை

கலங்குதல் என்றும் கண்ணியமில்லை

காதல் இல்லா நட்பில்லை

காமம் மட்டுமே காதலில்லை

காதலித்தல் பாவமில்லை

காத்திருத்தல் அவசியமில்லை

அன்பு இல்லா உறவில்லை

நட்பு இல்லா காதலில்லை

நண்பனை காதலித்தல் தவறில்லை

காதலோடே பிரிதல் இயலாததில்லை

நட்பு, காதல், காமம்

நடு நடுவே கோடுண்டு

கோடு மிதித்தல் கையிலில்லை

இயல்பில்லா உணரவில்லை

வாழ்க்கை

2009-08-17T18:56:00.005-04:00

விட்டு விட்டு புயல் வீச
மீதம் இருப்பது சருகு தான்
தொட்டு தொட்டு தென்றல் பேச
துவண்டு விடுவது அழகுதான்t
தூறித் தூறி மழை பெய்ய
தூசு தரும் வாசம்தான்
வெட்டி வெட்டி அடிக்கும் வெயில்தான்
வெளிச்சம் தரும் நாள்முழுதும்

இசை என்னும் இன்ப வெள்ளம்

2009-08-10T11:03:00.009-04:00

மடை திறந்த வெள்ளம்

பாய்ந்தோடும் இன்பம்

இசை என்னும் இனிய மழையில்

பரவசமாகும் உள்ளம்

இசைக்கு மொழி இல்லை

மொழிக்கு எல்லை இல்லை

ஏழு ஸ்வரங்களுக்குள்

இல்லாத இராகமில்லை

நரம்புகளைத் தொட்டுவிடும் நாதம்

நினைவுகளைத் மீட்டுவிடும் இராகம்

வரம்புகளைத் தாண்டிவிடும் கீதம்

கனவுகளைத் தூண்டிவிடும் கானம்

மூட்டமாய் தெரியும் மேகம்

மெல்லிய காற்றில் வீசும் குளிர்

வாட்டமாய் இருக்கும் முகமும்

பூத்திடும் சிறிய புன்னகை

காற்றிலே வரும் இனிய ஸெல்லோ

பாட்டினிலே வீசும் தென்றல்

நிரம்பி வழியும் இசையில்

நிறைவாகும் இந்த மனம்

நாளை என்ற கவலை நீங்கிவிடும்

இன்று மட்டும் தெளிவாகிவிடும்

கதிரவனைக் கண்ட பனி போல்

கரைந்திடும் கவலைகள் இசையில்

(Written on 8/9/09 at Cello concert by Yo-Yo Ma in Tanglewood, Mass)

அம்மா

2009-06-26T23:20:00.002-04:00

காற்றடிக்கும் திசையில்

பறந்திடும் பட்டம்

காத்திருக்க வைக்கும்

அமெரிக்க சட்டம்

ஆசையைத் துறக்க

நான் ஆதி சங்கரன் இல்லையே

பாசத்தில் பரிதவித்து

பித்து மனம் கொண்டேனே

பெற்றவளை பார்த்து வர

பிள்ளை மனம் ஏங்கும்

கற்ற வித்தை அனைத்தும்

கால் தூசாய் மாறும்

கல்லாக மாற மறுத்த

கடைக்குட்டி மனமே

வில்லாக வளையுமோ

வீசும் புயலுக்கு நிமிருமோ

அம்மாவைப் பார்க்கும் வரை

அடி மனத்தில் வலிக்கும்

வலி மறக்கும் சாதனையில்

வார்த்தைகள் பிறக்கும்

உடல் வலித்தால்

உதடு முனகும் அம்மா என்று

மனம் வலித்தால்

கரம் எழுதும் கவிதை இன்று

march 26/09

அன்புள்ள சகோதரனுக்கு

2009-06-26T18:46:00.002-04:00

வேரில்லா மரம் நாணலாய் மாறிடுமோ

உறவிழந்த மனம் உணர்வுகளில் ஊசலாடுமோ

இரவு வரும் பகலும் வரும்

புதிய உறவுகளில் பிறப்பும் வரும்

இறந்து விட்ட உன் முகம் மட்டும்

இன்னும் இளமையாய் நினைவில் வரும்

சமையல் சாப்பாடு வேலை உறக்கம்

தினப்படி வாழ்க்கை கழிந்து விடும்

நாட்கள் ஓடும் வேகத்தில்

23 வருடங்கள் எங்கோ பறந்திடும்

சில நாட்கள் மனம் மறக்கத் தவிக்கும்

சில நாட்கள் ஏன் மறந்தோம் எனத் துடிக்கும்

சலனம் மிகுந்த எண்ண அலைகள் ஓய்வதில்லை

காலச்சக்கரம் யாருக்கும் நிற்பதில்லை

மார்ச் 20 2009

Lonely leaf - ஒற்றை இலை

2009-06-26T07:57:00.009-04:00

ஒற்றை இலை

நாடு விட்டு நாடு வந்த
நம்மைப் போல்
மரம் நழுவி
மண்ணில் விழுந்த இலை

நாடோடியாய் நின்றபோதும்
நளினம் குறைய வில்லை
கல்லிலும் ஈரம் உண்டு
மண்ணிலும் குளிர்ச்சி உண்டு

வீசும் காற்றின்
வேகத்தில் விழுந்ததோ
பேசும் இராகத்தில்
பறந்து விழுந்ததோ

தனிமையில்
தன்னினிமை உணர்ந்ததோ
இளைமையில்
இணை தேடி நின்றதோ

பச்சை இலையும்
பழுக்கும்
இச்சை குறைந்து
உலரும்

வாடிய போதும்
வாசம் தரும்
இலை விழுந்த பின்னும்
மரம் துளிர்த்து விடும்

2009-06-26T07:55:00.001-04:00

My old poems are posted in the poetry section in pdf format. New poems will be written in the blog as posts. Life is too short. Let us enjoy it as much as we can.

அறிமுகம் - Introduction poem

2009-02-24T20:37:00.003-05:00

பெயரில் வடமொழி உண்டு
எண்ணத்தில் தமிழ் மொழி உண்டு
படித்தது மருத்துவம்
பிடித்தது தமிழ் இலக்கியம்

எண்ணத்தில் எழுந்தது
எழுத்தாய் மாறுவதுண்டு
கண்டதும் கேட்டதும்
கவிதையாய் மாறுவதுண்டு

Mana-vasanai- Fragrance of mind

2009-02-24T19:27:00.001-05:00

Manvasanai means the fragrance of land in Tamil, Indian language. This blog will include the fragrance of my mind. This will have my Tamil kavidhaigal (Poetry), English writeups on medicine, life, travel, books and my own recipes on fusion cooking.
I will try my best to translate as mush as possible in english.